Barangay Profile
Barangay Garang

Part 1 – Profile / Description of the Barangay

A. Historical Background

            Ang Barangay Garang anaa nahimutang sa habagatang bahin sa Panguil Bay sa syudad sa Tangub, ug kining maong barangay kaniadto usa pa ka sitio ug nahisakup sa Barrio Labuyo nga gidumala ni Benito Roa. Ug nahimong Barangay sa dihang si Former Mayor Alfonso D. Tan nakadesider sa pag-transfer gikan sa sitio ngadto sa Barangay sa tuig 1960’s nga sa pagkakaron ang maong Barangay imong makita nga panahon sa seasonal cropping, nindot nimong sud-ongon ang mga tanum nga naa ang kahimsung, katambuk ug ang mga bunga ni ini puno sa kadasig, ug imong masinate nga diha sa maong talan-awon nagsumikad ang pagkinabuhi sa taga-barangay.

            Bahin sa kahimtang sa yuta imong makita ang kapatag niini, apan adunay portion niini nga hilabihan ka-lalum nga gani kaniadtong unang panahon mao man gani, nga kini gihinganlan ug “garang” nga nagpasabot nga gansang, huyong-huyong or naghagubhub kay kon imong pikpikon maghagubhub man, kay kon imoong matumban sama sa nangka nga nahinaug, ug mao usab ang kasaggaran nga sakit sa katawhan sa maong barangay ang butod sa tiyan. Ug kining maong barangay gidumala kini ni Tenyente Jose Cabigas sa 1950’s.

B. Physiographic Profile

1. Location, Area and Access

            Ang Barangay Garang, usa sa katursi ka mga barangay nga nagliyuk sa Panguil Bay, ug kini nahimutang sa habagatang bahin sa maong Panguil Bay, sa amihang bahin sa Sta.Cruz, sa silangang bahin sa Barangay San Apolinario ug sa kasadpang bahin sa Barangay Maquilao.

            Kining maong barangay adunay total land area nga 200.8967 hectares, ug kini may gilay-on nga 1.8 kilometers gikan sa syudad, ug kasagaran nga sakyan sa mga katawhan mao ang motorcycle ug kini mudagan lamang sa mga 5 ka minutos.

2. Climates and Rainfall

Bahin sa klima sa barangay, gikan sa bulan sa Enero ngadto sa bulan sa Mayo, atong masinate ang hilabihan nga kainit sa maong panahon ug gikan sa bulan sa June anaa ang ginagmay nga ulan-ulan ug gikan sa Hulyo ngadto sa Nobyembre anaa ang ulan nga kusog ug sa Disyembre ang kabugnaw sa panahon.

C. Socio-Economic Profile

1. Population

            Atong makita nga sa tuig 1996 ang Barangay Garang adunay namuyo nga 1,242 ka mga tawo diin 618 niini mga lalaki ug 624 niini mga babaye. Kini gilangkuban sa 217 ka bubong nga gibahin-bahin ngadto sa 6 ka purok.

2. Age Distribution

Age Distribution
CY-1996

Source: Rose Mary Canas

            Atong makita nga bahin sa pangidaron sa mga lumulopyo sa maong barangay ang 6-10 years mao ang nag-una diin nakuha sa 15.53% gisundan sa 0-5 years nga nakakuha sa 12.96% gisundan sa 11-15 years nakakuha sa 12.72% gisundan sa 16-20 years nakakuha sa 10.70% gisundan sa 21-25 years nga nakakuha sa 7.24% gisundan sa 31-35 years nga nakakuha sa 6.84% gisundan 46-50 years nga nakakuha sa 6.68% gasunod ang 26-30 years diin nakakuha sa 6.36% gasunod ang 36-40 years diin nakakuha sa 5.71% sunod ang 41-45 years nakakuha sa 5.23%, 61 above nakakuha sa 4.26% gasunod ang 56-60 years nakakuha sa 3.38% ug ang katapusan 51-55 years nga nakakuha sa pinakagaay nga porsiyento nga 2.25%.